تنبيه

تــنـبـيـه ... كــل ما يـنـشر بهـذه المـدونـة مـسـجـل من قـبـل حـقـوق الـمـلكـية الفـكـريـة و أي اقـتـبـاس او نـقـل لمحتـوى المدونـة يعرضــك للمسـائلـة القـانـونـيـة

الاثنين، 25 يوليو 2011

بــلابيــص !!!! يـــا مـغيــــــــــــث



يادي الفضيحة ام حناجر يا دي الجرصة ام جلاجل  اتجننوا دول ولا اية هو النهاردة كم في الشهر هو النهاردة مولد سيدي العريان ولا اية ، اية الحكاية !!؟ الرجالة دي مش لابسة بنطلوناتها لية يا وديـــع !!! تكونش الكاميرا الخفية فين فين .. فين ونبي مخبينها فين ؟؟! ولا عاملين ديفلية للملابس الداخلية  على كورنيش القصر العيني !!!! هي حبكت  يمكن ... يكونش اعتصام  و القلع ده رمز انهم قرفوا و طلعوا من هدومهم جايز بس فين اليفط مافيش ولا يافطة ولا هتفاية واحدة فين الشعارات الهادفة فين الهتافات الرنانة لقد  ولدتنا امنا عرايا و لن نلبس بعد اليوم ، عاش الشعب حر ...  اقلع مش هايضر و يا عزيز يا عزيز الشعب المصري سربتيز ، حط الكف على الميزان اقلع لبسك في الميداااان ....... ياااااااه الواحد جسمه قشر من الوطنية.

14شاب يتراوح اعمارهم من 15 لـ20 سنة قلعين اقصد لابسين شورتات و بوكسرات و كل حاجة اخرها  تــات و عاملين ربكة مرورية في الشارع و حوليهم 3 عساكر مرور بيعملوا اية دول كمان ، يا إخونا الموضوع كبير اوى و محتاج حنكة و خبرة سيادة ساعدة المقدم العقيد اللواء الوزير أبو دكة باشا الملط مافيش فايدة دايما الشرطة بتغفل عن اهم كوادرها و انشطهم ، ما علينا مسيرك يوم تفحمهم يا ابو دكة و تقــُش

الستات صوتت و الرجالة كشرت و الناس اتلمت و دول ماشيين في مسيرتهم و ماحدش عارف يوقفهم كانوا واقفين بالظبط عند رصيف مستشفى القصر العيني اتجمعوا و اتهيئوا و اتحنجلوا و عبروا الطريق في اتجاهم للكورنيش و هوب نط الاول ثم الثاني ثم الثالث ،  ااااااااه الافندية فاكرينه شاطئ ابو هيف ده ولا اية !! الان وضحت الرؤية و لكن السؤال الذي يطرح نفسه في هذه اللحظة اين تركوا ملابسهم
1-   على الرصيف المقابل للمستشفي
2-   في امانات المستشفي
3-   للعساكر التلاتة
4-   نازلين من بيتهم كدة
ارسل اجاباتك على ص . ب  6 ش . كالسون باشا ،  كورنيش ابو دكة بالأساتك

نهر النيل الخالد اصبح ترعة كفر ابو بوكسر يا فضحتك يا مصر ، المهم بعد الشباب الواعد ما بلبط في النيل  الجموع اتفضت و الطريق اتفتح و الميني باص اتحرك و الكل ضحك و الأراشانات مصمصت شفايفها و الشيوخ تفت على ده جيل و الكل استقر ، كملنا رحلتنا المرورية المعتادة الي ان وصلنا الي محطة فم الخليج و عند النافورة ازبهليت من جديد ست سبع اطفال لا يتجاوزوا العشر سنوات بيعوموا في النافورة بلابيص و العجيب و الغريب ان النافورة اصلا مش شغالة و مابتشتغلش و مايتها راكدة و يدوبك تغطي انكل رجلك و دول مزئطاطين في الماية  و بيلعلطوا ولا القراميط ولا اكنهم في منتجاعات زفتا !!
اية موضة القلع اللي ماشية في البلد دي ، واضح ان النهاردة يوم القلع العالمي ،  الحر خرج الناس من هدومها خلاص يا جدعان ،  ربنا يستر و الشوطة ماتجيش في البنات ده لو حصل السياحة المصرية هاتنشط و تنتعش  في لحظة  و الدخل القومي هايزيد و الاجور هاترتفع و بعد ما كان موسم السياحة في مصر بيكون ذروته في الشتا هاتكون ذروته في الصيف و احنا السنة عندنا بقيت كلها صيف و الحمد لله   و سمعني سلام يا حلاوتك يا بلادي البلابيص بتنادي

تحياتي
هاجر العشري

الأربعاء، 13 يوليو 2011

امـسـك منـخيــــري من فـضـلك





كلاكيت اول مرة :

الابطال : مع الاسف انا و راكبي الميني باص
المشهد : خارجي سور مجري العيون ظهرا بالميني باص

زوم إن على عيني الحالمة المشرئبة المنشكحة باليوم الاول في الشغل ياااااااااااه اخيرا اشتغلت هو اه مش تخصصي و مش دراستي اصلا و مش عاجبني من الاساس و لكنها البداية و النجاح قادم بإذن الله و فجاءة آن آآآآآآآن زوم أوت للاتوبيس كله اية الريحة المقرفة دي !! مين يا إخونا اللي قلع جزمته لا ده مش واحد دي قبيلة بني عبس كلها قلعت اين حنظلة يا كفرة قـُبحتم جميعا
أتلفت يمين و شمال الناس لابسة جزامها و عايشين و شميين عادي جدا امال انا اللي هاموت لوحدي لية  !!
و كـأي بني ادم طبيعي في مثل موقفي الانساني المرير خرجت راسي من الشباك اشملي شوية هوا نضيف
إإإفففففففففف دي الريحة برة اكتر
و انا مكرمشة منخيري و ممتعضة من الريحة سألت اللي جنبي
اية الريحة دي !!؟
بصتلي الست و كأني قتلتلها قتيل غالى على قلبها جدا
انتي اول مرة تركبي ولا اية يا أوختشي دي ريحة المدابغ .

كلاكيت تاني مرة :

انا اية اللي دبسني في الشغل ده موظفين الحكومة اخر نفسنة و شغلهم الشاغل دي قالت و دي عادت و دي اطلقت و دي اتجوزت و اخر همهم الشغل و مصلحة العمل .... الناس دي وحشة اوى  و الريحة دي وحشة اوى !! اه صحيح دي المدابغ

كلاكيت تالت مرة :

ها قربنا يا جماعة هوبا يالا فييششششششششش رشيت برفان الريحة راحت !!! لاء

كلاكيت رابع مرة :

خد نفس عمييييييييق اكتم 1 2 3 4 5 .... 30 هوا هافطس هوا هوا بادي هوا مافيش فايدة لازلت بدائرة الريحة هي الناس دي بتنتج اية بيبيي !!

كلاكيت 600 مرة :

جاتنا نيلة في حظنا الهباب انا اية اللي رماني على الشغلانة دي لا كدة كتير over انا جبت اخرى خلاص طموحي بيموت يا جدعان قرار نوهائي انا هاسيب الشغل ده و ليكن ما يكون
كمان !!  ماهي ناقصة اية كم الزبالة دي كلها اية اللي جابها هنا هو احنا ملاحقين على ريحة المدابغ لما ترموا كمان زبالة فين الحكومة تيجي تشوف أودي وشي فين من السياح

كلاكيت 900 مرة :

لا بقي دى قلة ادب ماحدش عارف يلمكوا ولا اية ... اية مافيش احترام لا للناس ولا الحكومة ولا الطريق ولا التاريخ فينك يا قلاوون فينك يا غوري تعالوا شوفوا احفادكم عملوا اية في مشروعكم سور مجرى العيون العظيم اصبح مقلب زبالة عظيم
انا خلاص منخيري وقعت من الريحة دي

كلاكيت 1460 مرة :

4 سنين فاتوا من عمرى وانا زي مانا في شغلى خلاص ماعدش في أمل واضح اني هافضل في الشغل الفقري ده طول عمرى ، قولنا الثورة هاتعدلها لكن الحكومة هاتفضل حكومة و الغنم هتفضل غنم و الحرامية لسة حرامية  و الريحة هي الريحة لا زادت ما اشد اسفى على الصرح (سور مجري العيون) اصبح اسطبل لخيل المدابغ و العربجية و مقلب زبالة عظيييييييم يقصده الزبالين من كل حدب و صوب بسم الله ما شاء الله تلال تلال من الزبالة تصل لعنان السماء إشي هدم بيوت على شجر على فضلات منزلية على فضلات مدبغية على بيبيي حيوانية على حيوانات ميتة و مرمية حتى الحيوانات الميتة فتحولها فرع هنا
نشرت صحيفة الاهرام من اسبوعين تلاتة كدة إن زبال حكومي كان بيحاول ينضف عند السور اتلموا الناس عليه و ضربوه علشان مايجيش جنب ثروتهم المزبلية و في الميني باص طلعوا أوشاعة انه اضرب لحد ما مات و الله أعلم طيب منعوه لية !! اية الهدف من تشوية الاثر !! و من اليد الخفية وراء ذلك ؟؟

و السؤال الذي يطرح نفسه هو احنا هاننضف أمتى؟!
 متى سـَيسـّلم حنظلة؟؟!


اترككم مع المأساة
لقطت بعدستي 









تحياتي
هــاجــر العشــري