تنبيه

تــنـبـيـه ... كــل ما يـنـشر بهـذه المـدونـة مـسـجـل من قـبـل حـقـوق الـمـلكـية الفـكـريـة و أي اقـتـبـاس او نـقـل لمحتـوى المدونـة يعرضــك للمسـائلـة القـانـونـيـة

الاثنين، 25 يوليو 2011

بــلابيــص !!!! يـــا مـغيــــــــــــث



يادي الفضيحة ام حناجر يا دي الجرصة ام جلاجل  اتجننوا دول ولا اية هو النهاردة كم في الشهر هو النهاردة مولد سيدي العريان ولا اية ، اية الحكاية !!؟ الرجالة دي مش لابسة بنطلوناتها لية يا وديـــع !!! تكونش الكاميرا الخفية فين فين .. فين ونبي مخبينها فين ؟؟! ولا عاملين ديفلية للملابس الداخلية  على كورنيش القصر العيني !!!! هي حبكت  يمكن ... يكونش اعتصام  و القلع ده رمز انهم قرفوا و طلعوا من هدومهم جايز بس فين اليفط مافيش ولا يافطة ولا هتفاية واحدة فين الشعارات الهادفة فين الهتافات الرنانة لقد  ولدتنا امنا عرايا و لن نلبس بعد اليوم ، عاش الشعب حر ...  اقلع مش هايضر و يا عزيز يا عزيز الشعب المصري سربتيز ، حط الكف على الميزان اقلع لبسك في الميداااان ....... ياااااااه الواحد جسمه قشر من الوطنية.

14شاب يتراوح اعمارهم من 15 لـ20 سنة قلعين اقصد لابسين شورتات و بوكسرات و كل حاجة اخرها  تــات و عاملين ربكة مرورية في الشارع و حوليهم 3 عساكر مرور بيعملوا اية دول كمان ، يا إخونا الموضوع كبير اوى و محتاج حنكة و خبرة سيادة ساعدة المقدم العقيد اللواء الوزير أبو دكة باشا الملط مافيش فايدة دايما الشرطة بتغفل عن اهم كوادرها و انشطهم ، ما علينا مسيرك يوم تفحمهم يا ابو دكة و تقــُش

الستات صوتت و الرجالة كشرت و الناس اتلمت و دول ماشيين في مسيرتهم و ماحدش عارف يوقفهم كانوا واقفين بالظبط عند رصيف مستشفى القصر العيني اتجمعوا و اتهيئوا و اتحنجلوا و عبروا الطريق في اتجاهم للكورنيش و هوب نط الاول ثم الثاني ثم الثالث ،  ااااااااه الافندية فاكرينه شاطئ ابو هيف ده ولا اية !! الان وضحت الرؤية و لكن السؤال الذي يطرح نفسه في هذه اللحظة اين تركوا ملابسهم
1-   على الرصيف المقابل للمستشفي
2-   في امانات المستشفي
3-   للعساكر التلاتة
4-   نازلين من بيتهم كدة
ارسل اجاباتك على ص . ب  6 ش . كالسون باشا ،  كورنيش ابو دكة بالأساتك

نهر النيل الخالد اصبح ترعة كفر ابو بوكسر يا فضحتك يا مصر ، المهم بعد الشباب الواعد ما بلبط في النيل  الجموع اتفضت و الطريق اتفتح و الميني باص اتحرك و الكل ضحك و الأراشانات مصمصت شفايفها و الشيوخ تفت على ده جيل و الكل استقر ، كملنا رحلتنا المرورية المعتادة الي ان وصلنا الي محطة فم الخليج و عند النافورة ازبهليت من جديد ست سبع اطفال لا يتجاوزوا العشر سنوات بيعوموا في النافورة بلابيص و العجيب و الغريب ان النافورة اصلا مش شغالة و مابتشتغلش و مايتها راكدة و يدوبك تغطي انكل رجلك و دول مزئطاطين في الماية  و بيلعلطوا ولا القراميط ولا اكنهم في منتجاعات زفتا !!
اية موضة القلع اللي ماشية في البلد دي ، واضح ان النهاردة يوم القلع العالمي ،  الحر خرج الناس من هدومها خلاص يا جدعان ،  ربنا يستر و الشوطة ماتجيش في البنات ده لو حصل السياحة المصرية هاتنشط و تنتعش  في لحظة  و الدخل القومي هايزيد و الاجور هاترتفع و بعد ما كان موسم السياحة في مصر بيكون ذروته في الشتا هاتكون ذروته في الصيف و احنا السنة عندنا بقيت كلها صيف و الحمد لله   و سمعني سلام يا حلاوتك يا بلادي البلابيص بتنادي

تحياتي
هاجر العشري

هناك 9 تعليقات:

SHAPE YOUR LIFE (ABOALI) يقول...

شهد
جميل الموضوع ده واللى قبله
انا قريت الاثنين
وفعلا باتفق فى موضوع رمى بواقى البناء فى الطريق العام انى دى مسئولية حكومية بحتة
لانى من حكمة ربنا انى اعطى الحاكم سلطة التغير من خلال القوانين
وده حماية للمجتمع من امثال من يستهترون بكل شيىء وهولاء منهم
وانا باشوف الناس دى بصفة شبة دائمة
لاننا باعتبارنا شركة ادوية بنزور معهد الاوارم ومعهد الكبد وغيرها
فالطريق بيكون واحد ولازم نمر ونمتع النظر


اما عن بلابيص بلابيص

فده عنوانه
ان لم تستح فافعل ما شئت
وبرضوا ده يرجع للايد السايبة والليونة فى التعامل واستمرار البجاحة اللى البعض عايش فيها

عجبانى موضوعات على جبن يا اسطى
لانها فعلا على جنب وعند الوقوف والناظر فى عين هذا وهذا
نعرف الكثير والكثير
ان شاء الله القادم احسن

باحييكى دايما على رقيك فى التعبير وانسياب كلماتك كانها غدير

كل التقدير لانسان قدير

blue-wave يقول...

اتفق مع ابو على تماما

Unknown يقول...

راق لي ما وجدت هنا !

تحياتي و اعجابي

منجي باكير

http://zaman-jamil.blogspot.com/

السيد لاشين يقول...

مدونة ظريفة لطيفة خفيفة مخيفة، بريئة جريئة، من غير تزنيئة.
قادتني الاقدار ان ترسو سفينتي هنا حتى ارى ما اراه تقبلي مروري اللطيف املا ان يكون خفيف ظريف وليس مخيف
سيد لاشين مدون هاوي
www.lasshi73.blogspot.com

عبدالحميد خطاب يقول...

السلام عليكم

كلمات جميلة

هذه مدونتى ألقى نظرة عليها

ستعجبك

http://mytadwen.blogspot.com/

Dr Ahmed Said@Black Armor يقول...

جامد أوي البوست يا هاجر بجد ضحكت من قلبي بس ربنا يستر فعلا وما تكوني دي الموضة السنة دي

koukawy يقول...

ههههههههههههههههههههههه
الناس شويه و كلها هتقلع بلبوصه من الظلم

((هنادي الشرفا)) يقول...

راقت لى كلماتك


رائعة


احترامى

Samar El-Malah يقول...

أسلوبك .. هادئ .. قرأتُ كثيراً هُنا و عجزت أن أتركَ تعليقاً واحداً .. فاصفحي لي

http://life-wateen.blogspot.com/