تنبيه

تــنـبـيـه ... كــل ما يـنـشر بهـذه المـدونـة مـسـجـل من قـبـل حـقـوق الـمـلكـية الفـكـريـة و أي اقـتـبـاس او نـقـل لمحتـوى المدونـة يعرضــك للمسـائلـة القـانـونـيـة

الاثنين، 25 يوليو 2011

بــلابيــص !!!! يـــا مـغيــــــــــــث



يادي الفضيحة ام حناجر يا دي الجرصة ام جلاجل  اتجننوا دول ولا اية هو النهاردة كم في الشهر هو النهاردة مولد سيدي العريان ولا اية ، اية الحكاية !!؟ الرجالة دي مش لابسة بنطلوناتها لية يا وديـــع !!! تكونش الكاميرا الخفية فين فين .. فين ونبي مخبينها فين ؟؟! ولا عاملين ديفلية للملابس الداخلية  على كورنيش القصر العيني !!!! هي حبكت  يمكن ... يكونش اعتصام  و القلع ده رمز انهم قرفوا و طلعوا من هدومهم جايز بس فين اليفط مافيش ولا يافطة ولا هتفاية واحدة فين الشعارات الهادفة فين الهتافات الرنانة لقد  ولدتنا امنا عرايا و لن نلبس بعد اليوم ، عاش الشعب حر ...  اقلع مش هايضر و يا عزيز يا عزيز الشعب المصري سربتيز ، حط الكف على الميزان اقلع لبسك في الميداااان ....... ياااااااه الواحد جسمه قشر من الوطنية.

14شاب يتراوح اعمارهم من 15 لـ20 سنة قلعين اقصد لابسين شورتات و بوكسرات و كل حاجة اخرها  تــات و عاملين ربكة مرورية في الشارع و حوليهم 3 عساكر مرور بيعملوا اية دول كمان ، يا إخونا الموضوع كبير اوى و محتاج حنكة و خبرة سيادة ساعدة المقدم العقيد اللواء الوزير أبو دكة باشا الملط مافيش فايدة دايما الشرطة بتغفل عن اهم كوادرها و انشطهم ، ما علينا مسيرك يوم تفحمهم يا ابو دكة و تقــُش

الستات صوتت و الرجالة كشرت و الناس اتلمت و دول ماشيين في مسيرتهم و ماحدش عارف يوقفهم كانوا واقفين بالظبط عند رصيف مستشفى القصر العيني اتجمعوا و اتهيئوا و اتحنجلوا و عبروا الطريق في اتجاهم للكورنيش و هوب نط الاول ثم الثاني ثم الثالث ،  ااااااااه الافندية فاكرينه شاطئ ابو هيف ده ولا اية !! الان وضحت الرؤية و لكن السؤال الذي يطرح نفسه في هذه اللحظة اين تركوا ملابسهم
1-   على الرصيف المقابل للمستشفي
2-   في امانات المستشفي
3-   للعساكر التلاتة
4-   نازلين من بيتهم كدة
ارسل اجاباتك على ص . ب  6 ش . كالسون باشا ،  كورنيش ابو دكة بالأساتك

نهر النيل الخالد اصبح ترعة كفر ابو بوكسر يا فضحتك يا مصر ، المهم بعد الشباب الواعد ما بلبط في النيل  الجموع اتفضت و الطريق اتفتح و الميني باص اتحرك و الكل ضحك و الأراشانات مصمصت شفايفها و الشيوخ تفت على ده جيل و الكل استقر ، كملنا رحلتنا المرورية المعتادة الي ان وصلنا الي محطة فم الخليج و عند النافورة ازبهليت من جديد ست سبع اطفال لا يتجاوزوا العشر سنوات بيعوموا في النافورة بلابيص و العجيب و الغريب ان النافورة اصلا مش شغالة و مابتشتغلش و مايتها راكدة و يدوبك تغطي انكل رجلك و دول مزئطاطين في الماية  و بيلعلطوا ولا القراميط ولا اكنهم في منتجاعات زفتا !!
اية موضة القلع اللي ماشية في البلد دي ، واضح ان النهاردة يوم القلع العالمي ،  الحر خرج الناس من هدومها خلاص يا جدعان ،  ربنا يستر و الشوطة ماتجيش في البنات ده لو حصل السياحة المصرية هاتنشط و تنتعش  في لحظة  و الدخل القومي هايزيد و الاجور هاترتفع و بعد ما كان موسم السياحة في مصر بيكون ذروته في الشتا هاتكون ذروته في الصيف و احنا السنة عندنا بقيت كلها صيف و الحمد لله   و سمعني سلام يا حلاوتك يا بلادي البلابيص بتنادي

تحياتي
هاجر العشري

الأربعاء، 13 يوليو 2011

امـسـك منـخيــــري من فـضـلك





كلاكيت اول مرة :

الابطال : مع الاسف انا و راكبي الميني باص
المشهد : خارجي سور مجري العيون ظهرا بالميني باص

زوم إن على عيني الحالمة المشرئبة المنشكحة باليوم الاول في الشغل ياااااااااااه اخيرا اشتغلت هو اه مش تخصصي و مش دراستي اصلا و مش عاجبني من الاساس و لكنها البداية و النجاح قادم بإذن الله و فجاءة آن آآآآآآآن زوم أوت للاتوبيس كله اية الريحة المقرفة دي !! مين يا إخونا اللي قلع جزمته لا ده مش واحد دي قبيلة بني عبس كلها قلعت اين حنظلة يا كفرة قـُبحتم جميعا
أتلفت يمين و شمال الناس لابسة جزامها و عايشين و شميين عادي جدا امال انا اللي هاموت لوحدي لية  !!
و كـأي بني ادم طبيعي في مثل موقفي الانساني المرير خرجت راسي من الشباك اشملي شوية هوا نضيف
إإإفففففففففف دي الريحة برة اكتر
و انا مكرمشة منخيري و ممتعضة من الريحة سألت اللي جنبي
اية الريحة دي !!؟
بصتلي الست و كأني قتلتلها قتيل غالى على قلبها جدا
انتي اول مرة تركبي ولا اية يا أوختشي دي ريحة المدابغ .

كلاكيت تاني مرة :

انا اية اللي دبسني في الشغل ده موظفين الحكومة اخر نفسنة و شغلهم الشاغل دي قالت و دي عادت و دي اطلقت و دي اتجوزت و اخر همهم الشغل و مصلحة العمل .... الناس دي وحشة اوى  و الريحة دي وحشة اوى !! اه صحيح دي المدابغ

كلاكيت تالت مرة :

ها قربنا يا جماعة هوبا يالا فييششششششششش رشيت برفان الريحة راحت !!! لاء

كلاكيت رابع مرة :

خد نفس عمييييييييق اكتم 1 2 3 4 5 .... 30 هوا هافطس هوا هوا بادي هوا مافيش فايدة لازلت بدائرة الريحة هي الناس دي بتنتج اية بيبيي !!

كلاكيت 600 مرة :

جاتنا نيلة في حظنا الهباب انا اية اللي رماني على الشغلانة دي لا كدة كتير over انا جبت اخرى خلاص طموحي بيموت يا جدعان قرار نوهائي انا هاسيب الشغل ده و ليكن ما يكون
كمان !!  ماهي ناقصة اية كم الزبالة دي كلها اية اللي جابها هنا هو احنا ملاحقين على ريحة المدابغ لما ترموا كمان زبالة فين الحكومة تيجي تشوف أودي وشي فين من السياح

كلاكيت 900 مرة :

لا بقي دى قلة ادب ماحدش عارف يلمكوا ولا اية ... اية مافيش احترام لا للناس ولا الحكومة ولا الطريق ولا التاريخ فينك يا قلاوون فينك يا غوري تعالوا شوفوا احفادكم عملوا اية في مشروعكم سور مجرى العيون العظيم اصبح مقلب زبالة عظيم
انا خلاص منخيري وقعت من الريحة دي

كلاكيت 1460 مرة :

4 سنين فاتوا من عمرى وانا زي مانا في شغلى خلاص ماعدش في أمل واضح اني هافضل في الشغل الفقري ده طول عمرى ، قولنا الثورة هاتعدلها لكن الحكومة هاتفضل حكومة و الغنم هتفضل غنم و الحرامية لسة حرامية  و الريحة هي الريحة لا زادت ما اشد اسفى على الصرح (سور مجري العيون) اصبح اسطبل لخيل المدابغ و العربجية و مقلب زبالة عظيييييييم يقصده الزبالين من كل حدب و صوب بسم الله ما شاء الله تلال تلال من الزبالة تصل لعنان السماء إشي هدم بيوت على شجر على فضلات منزلية على فضلات مدبغية على بيبيي حيوانية على حيوانات ميتة و مرمية حتى الحيوانات الميتة فتحولها فرع هنا
نشرت صحيفة الاهرام من اسبوعين تلاتة كدة إن زبال حكومي كان بيحاول ينضف عند السور اتلموا الناس عليه و ضربوه علشان مايجيش جنب ثروتهم المزبلية و في الميني باص طلعوا أوشاعة انه اضرب لحد ما مات و الله أعلم طيب منعوه لية !! اية الهدف من تشوية الاثر !! و من اليد الخفية وراء ذلك ؟؟

و السؤال الذي يطرح نفسه هو احنا هاننضف أمتى؟!
 متى سـَيسـّلم حنظلة؟؟!


اترككم مع المأساة
لقطت بعدستي 









تحياتي
هــاجــر العشــري

الاثنين، 6 يونيو 2011

امسك حرامـــــــــــــي

بصوا بقي انا ايدي وجعتني من الكتابة اية ده كل دول ناس سارقة اشعاري هي حلوة للدرجة يعني !!!!
بعمل سيرش في جوجل لاقيت بلاوي و عمالة اعلق بقي و ازعق و اشتكي لما تعبت من امبارح و انا في معانا ياريتني ما عملت سيرش كان زماني مروقة دماغي
هي الناس ماعدش عندها ضمير كدة لية ازاي تنسب لنفسها عمل و مجهود مش ليها و ازاي تشعر بسعادتها و الناس بتعلق على عمل مسروق طيب اية احساسك الداخلى و انتا سارق و بترد على اعجاب الناس بالموضوع اللي انتا سرقته بأنى وش بتر بأنى احساس

يا جماعة اتقوا الله
دي سرقة هو انتا لازم تدب ايدك في جيب حد عشان تبقي سرقته ما انتا سرقت افكاري و مجهودي و عصارة فكرى عشان اطلع كلمة كويسة تعجبك فاتسرقها

حسبي الله و نعم الوكيل

لو حاجة عجبتك و حبيت تنشرها على صفحتك ولا مدونتك و ماله بس اكتب انه منقول اكتب اسم المدونة و اسم صاحب المدونة مش تستهبل و تنسبها لنفسك

لا و واحد حدق محرف شوية في الكلمات يعني انتا كدة مش هاتتقفش اديني قفشتك

اتقوا الله

هاقول اية القافلة تسير و الكلاب تعوى و حسبي الله و نعم الوكيل

تحياتي

هاجر العشري

الاثنين، 23 مايو 2011

شيتــــــة و النســــــــــانيـــــــــــس



الاطفال احباب الله....أيوة الله ، بس هل المثل ده ينطبق على اولاد الست شيتة اشك ، و السبب بصيت دول اصلا مش اطفال دول عفاريت يعلموا ابليس اصول الابلسة و العفرته و الشيطنة و الشعننه اعوذ بالله في عيال  كدة في الدنيا .




في أمان الله و سلامه طلعت الميني باص كرسي فاضي الحمد لله و كمان جنب الشباك الشكر لله اية ده الاسطي سلامة  لالالالا دي هاصت اوي احسن سواق في الموقف  واضح ان اليوم هايكون مشرق ، خارجين من الموقف و فجاءة آن آآآآآآآآآآآآآآآآآآن شيتة و عيالها ع الناصية ماتوقفش ونبي ونبي يا اسطي سلامة سيبهم و انا هادفعلك التذكرتين و نبي ونبي  لاءءءءءءءءءة  وقفلهم سلامة لية يا سولم ده انا كنت هادفعلك  مافيش فايده لله الامر من قبل و من بعد ، ادور بعيني يمين و شمال اشوفها هاتقعد فين مادتنيش فرصة ورايا و رشقت يادي اليوم اللي مالوش ملامح لية دايما ورايا !! اعمل اية في الكرسي ده أولع فيه ولا ألزق فيه لبان ولا اغرقه ماية عشان ماتقعدش ورايا .... الامر لصاحب الامر ، شيتة قعدت على الطرف و القردين جنب الشباك ورا قفايا عدل  و بدءت المأساه ( يا منجي الوحش من الجحش يا رب )
-        اشمعنى انت اللي تقعد عند الشباك انا هاقعد هنا مع نطه من القرده الصغيرة على اخوها عشان تقعد
-        عااااااااااااااااه يا ماما انا عايز الشباك ماليش دعوة و بالبونية في خلقة اخته تسكت النسناسة الصغيرة رزعته بالقفا الواد خبط في راسي ( منه له) يا رب ما يشدوا شعر بعض زي المرة اللي فاتت ولا يعضه بعض زي اللي قبلها
و اخيرا اخرستهم امهم بقلمين ( احسن احسن إلهى تنهدوا بقي ) طبعا في سري

لا يا ست شيتة حرمت ونبي بلاش الشيبسي انا عملتلك حاجة يا ست ام النسانيس  ، و كمان بالخل بقشعر من ريحته .....  مافيش فايدة
طبقا للنظرية المعروفة للقرود  و هي كالاتي قرد + كيس شيبسي + فتح البق مع المضغ = قرقضة و فرفتة و تلويك ويك ويك
استلم القردين الكيسين و بكل جدارة و قدارة و مهارة قرمشوا و خرفشوا و خللوا في وداني لما قلبوا بطني إلهى سعاد المحروقة تاكلكوا هة بس .

و الان حان وقت الفرح و المرح و منوعات القناة الثانية مع الفقرة الغنائية مع قرادينوا و نسااااانيسوووووو
و الدنيا زي المرجيحة يوم تحت تكا تتكا تكا ( دي شلاليت في الكرسي اللي قاعدة عليه من تحت ) و فوق وفوق وفووووووووق ( ده بأيدهم على ضهر الكرسي بتاعي من فوق من فوق من فوق ) و تي را تيرريريري تيراتتاتتارا و طبعا الخل بيهفهف مع الغناء و الفنون الاستعراضية الرائعة دي ( إلهى يحلبوكوا مع جاموسة هابلة )
- بس يا حبايبي ( يا ولاد القردة ) عشان بتخبطوا في الكرسي بتاعي
- اتهد يا بن المهبولة ( صدقتي حقا ) انتا و هي جبتولنا الكلام من اللي يسوا و اللي مايسواش
مايسواش إلهى تنشكي في ودانك يا ام النسانيس مايسواش مايسواش المهم يفصلوا شوية بقي.

طبعا و كالعادة الميني باص أتزحم عادي جدا و الناس بدءت تتأفف عادي برده و التلقيح على اللي قاعدين بيتزايد لازم تعمل نفسك عبيط في تلك اللحظة كل اللي قاعدين وقعوا على ودانهم و هما صغيرين مش بيسمعوا كويس
لكن الوضع مختلف شوية مع شيتة هانم  في نسانيس صغيرة جنبها ممكن تقوم و كالعادة و زي كل مرة حصلت الخناقة إياها
-        عالم ماعندهاش دم ... ( شيتة منفضة ) .... اوف مافيش حد يقوم ويقعدني يا ولاد ( شيتة مستهبلة ) في اللحظة دي تستعين الست بصديق ماتشوفي واحدة يا اوختشي تقعدك بدل عيالها ( شيتة رامية ودانها برة الميني باص مابتسمعش) مافيش فايدة لازم الوضوح في اللحظة دي واحدة اية يا أوختشي اللي تقوم اديكي شايفة الولية مقعدة العيلين و سايبة الكبار واقفين
-        ولوله عليكي بادري يا أختشي انتي مالك دفعالهم و مش هايقوموا
-        ايوة مش هانقووووووووووم مش هانقوووووووووم ( دول طبعا كورال النسانيس )

و تخيلت الست شيتة في بيتها و هي لابسة جلد معزة و واقفة على ترابيزة السفرة بتتنطط و  النسانيس حواليها بيصرخوا صرخة طرازان و بيدوروا حولين الترابيزة و يقولوا أوميجا أوميجا لالاة أميجو أميجو زي ثلاثي اضواء المسرح تمام .
اخرجتني من تخيلاتي الكلمة التي انتظرتها من اول الخط
- ايوة هنا على جنب يا اسطى و نزلت شيتة و نسانيسها روحة بلا راجعة إن شاء الله




تحيـــاتي
هـــاجــر العشري

الاثنين، 16 مايو 2011

اوبن بوفيـــــــة


يا ساتر يا رب بسم الله الحفيظ  اللهم ارفع مقطك و غضبك عنا يا رب أنبي يا رب تخرجني من دار البلا بلا بلا

هكذا و بكل تفاؤل و إشراقة استقبل رحلتي السعيدة الجميلة اللطيفة الهادئة كل يوم في الميني باص و المواصلات
المواصلات يا لروعة تلك الكلمة كلها موسيقي كلها كلاكسات و شتائم و بذائات و التعلب فات فات و مواصلاته لسة ماجات
اما انا فأحسن حالا من التعلب هاهو الميني باص يخرج من الموقف الطريق واقف... عادي الحمد لله عشان ألحقه و لحقته و ركبته كمان و طبعا لان حظي دايما من السما مالقتش كرسي فاضي و طبعا لان ربنا بيوقفلي دايما ولاد الحلال الاسطي اسامة قالي اقعد وراه على الموتور مؤقتا لان اغلب الركاب هاينزلوا السيدة عائشة ( بسيطة عشر دقايق مش قضية ) ، و هكذا جلست و كلي امل في كرسي فاضي ، اما عن القاعدة فالقاعدة ملوكي ماتور سخن ولا الفرن و ضهري مسنود على الهوا و مني للباب طوالي و الهوا بقي ماقولكوش ولا اكنى على اروع شواطئ جمصة .
طبعا الطريق لسه واقف من ساعة ما ركبت ماتحركش عجلة واحدة و طبعا برده الناس ببتوافد على الميني باص و بدءت الناس تقف في الممر بين الكراسي واضح اني مش هالحق كرسي ، و بعد ربع ساعة فتح الطريق .... سيري يا نورماندي بسم الله مجراكي و مرساكي .
نورماندي هاتغرق من كتر الركاب المرة دي ايه هي الناس دي ماشفتش ميني باص قبل كدة ولا اية ،اية الاقبال ده الناس بقت باظه من الباب و لسة ماوصلناش للسيدة عائشة منك لله يا اسطي اسامة.
و هوب و نط راجل على طرطوفة السلم اللي باينة من كتر الناس ماهى ماحشورة و ببسالة و شجاعة تخطي درجتين السلم و وصل لحد عندي الراجل ده عنده خبره في الغطس بين المخلوقات اللحمية لا و اية بايد واحدة التانية كان شايل بيها كيس بلاستيك اصفر كبير هايتقطع من الصينية المحشورة فيه و اكيد بدون ما اذكر استشفيته بخبرتكم الاوتوبيسية اين استقرت الصينية ايووووون استقرت على حجري بدون استأذان كان حجري ده من كماليات الميني باص !! ، كانت الصينية سخنه الحقيقة واضح ان المدام متوصيه بيه و عملة له مسقعة في الفرن و لولا انها مسقعة و لها معزة خاصة في قلبي انا كنت رميتها في وشه انتوا ماتعرفونيش.
طبعا السخنية كانت من فوق ( الصينية ) و من تحت ( الموتور) و من قدام و الجناب ( تلاحم قوى الشعب العريضة داخل الميني باص) حسيت ساعتها اني جيري لما استخبى من توم تحت الفرخة اللي كانت راقدةعلى بيضها و من كتر الحر فقص كنت حاسة اني هافقص قريب و اكون بذلك كسرت كل مقايس الفقص .

و اخيرا محطة السيدة عائشة ... في الحقيقة الاسطي اسامة ماكدبش في ناس فعلا نزلت السيدة عائشة ابو صينية و 2 كانوا متشعلقين على السلم و طلع مكانهم واحدة بمقام عشرة وقفت على السلم ( الله يقطع السلم و سنينه) كان معاها شوال كبيييير سد 3\4 السلم و تبقي 1\4 السلم وقفت هى عليه ولان السلم مش هايكفي كل التخوم و التلال و الهضاب و الشلالات المرتكزة على جسمها قررت تسند رجل على درجة السلم السفلية و رجل على درجة السلم العلوية و الفخدة على حجري انا ، اية ده كله اية ده كله جايبة منين الخير ده كله !!!
- حاسب يا خويا الشوال فيها اكل لا يتهرس من رجلك
كل شئ انكشفن و بان طبيعي لما تحط اكلها في شوال لازم تكون بالحجم الجامبو ده ، طبعا ركبي نملت من كتر تريحة الفخدة عليهم ... يارب ارفع مقطك و غضبك عني ... يا بركة دعاكي يامة في كرسي فضي و شلالات نياجرا راحت تقعد عليه و سابت الشوال على السلم مش مهم المهم ان الفخدة العجالى فارقت رجلي المسكينة ، و من جديد 4 يتشعبطوا على السلم و الناس تناشد السواق ماتركبش حد تاني كفاية ... حرام.... هانفطس ... يا اسطي
كان من ضمن الاربعة واحدة و ابنها والاسطي اسامة ابو قلب حونين رأف بحالها و قالها تقف بين الكرسي اللي جنبه و بين باب الميني باص المفتوح و هي ماكدبتش خبر نطت و انحشرت جنبي هي و ابنها  يجيلك و يحط عليك يا اسطي اسامة .

والان مع اعظم المحطات مع محطة اليوم و كل يوم لا سحر ولا شعوذا المحطة دي كانت في اوربا عشان خاطر حبيبنا نقلناها هنا يالا حيوا معانا ساقفة كبيرة لمحطة الدوييييييييييييييقة تارا تتا تا تتا تتا ترارارة تا تتاة تراررة تراه ترارة  . من اكثر المحطات المنغصة عيشتي في الميني باص و هذا لروعة سارقيها اقصد راكبيها و حسن خلقهم دايما معطائة الدويقة و خيرها مش ليها  ، ركب من هذه المحطة العزيزة راكب واحد فقط و الحمد لله انه واحد فقط ماسك شنطتين بلاستك سود مبلولين و مكببين !! و راسه و ألف جزمة يحشرهم جنبي ( هي المشرحة ناقصة قتله ) في تلك اللحظة التاريخية و تلك الركوبة الجهنمية خرجت عن سكوتي و اعربت عن غضبي بكل شمووووووخ
-         لو سمحت حضرتك كدة ماينفعش دي مبلولة و هاتبل هدومي
-         لا يا أبلة دي لحمة مجمدة فامرشحة شوية ماية ع الكيس ماتخفييييييييش
-         مرشحة ( الله يقرفك ) و طبعا الرشح ده كان مسنود في الشارع على الارض فاصبح طينة طينة طينة اكياسك فيها طينة ، طينة و هدومي يا جدعان اصبح فيها طيييييينة
المهم كلمة مني على كلمة منه و تبريقة منى على زغرة منه راح شال الاكياس من جنبي (طبعا رعبته بتبرقتي ) و هابدهم على الصندل عاااااااا الصندل ابيض الله يخرب بيوتكم ( طبعا في سري)
-         يعني حضرتك ينفع كدة سندتها على رجلي فرقت في اية ماهي مبلولة برده و بهدلتني ( لازم ادب القرود يظهر في هذا التوقيت حفظا لماء الوجه و المرمطة خاصة ان لاحظت ان الراجل ده من صفوة الدويقة )
-         قولنا مرشح يا ابلة مرششششحة اهو و  شال الكيسين و حشرهم  ورا رجل الست اللي كانت محشورة اصلا ورا الباب فكرينها...  اه ياعيني لسة واقفة نفس الوقفة ،  طبعا فضل جزء من الاكياس لازقة فيا برده و قولت امري لله و التلج بقي عمل عمايله هدى شعوري بالحرارة شوية و بعدين لاغي شعوري برجلي خالص  اللهم اني لا اسالك رد القضاء و لكن اسالك اللطف فيه
و بعد ان تجمد الوينج الشمال بأكمله و بعد مرمطتون و بهدلتون و طبيخ و بعد الزعيق و ادب القرود و التوبيخ ها هي محطتي هلموا معي بالصريخ على جنب يا اسطي و ها انا بعد المغامرة فرد صحيح و لله الحمد و التسبيح .


تحياتي
هاجر العشري