يا ساتر يا رب بسم الله الحفيظ اللهم ارفع مقطك و غضبك عنا يا رب أنبي يا رب تخرجني من دار البلا بلا بلا
هكذا و بكل تفاؤل و إشراقة استقبل رحلتي السعيدة الجميلة اللطيفة الهادئة كل يوم في الميني باص و المواصلات
المواصلات يا لروعة تلك الكلمة كلها موسيقي كلها كلاكسات و شتائم و بذائات و التعلب فات فات و مواصلاته لسة ماجات
اما انا فأحسن حالا من التعلب هاهو الميني باص يخرج من الموقف الطريق واقف... عادي الحمد لله عشان ألحقه و لحقته و ركبته كمان و طبعا لان حظي دايما من السما مالقتش كرسي فاضي و طبعا لان ربنا بيوقفلي دايما ولاد الحلال الاسطي اسامة قالي اقعد وراه على الموتور مؤقتا لان اغلب الركاب هاينزلوا السيدة عائشة ( بسيطة عشر دقايق مش قضية ) ، و هكذا جلست و كلي امل في كرسي فاضي ، اما عن القاعدة فالقاعدة ملوكي ماتور سخن ولا الفرن و ضهري مسنود على الهوا و مني للباب طوالي و الهوا بقي ماقولكوش ولا اكنى على اروع شواطئ جمصة .
طبعا الطريق لسه واقف من ساعة ما ركبت ماتحركش عجلة واحدة و طبعا برده الناس ببتوافد على الميني باص و بدءت الناس تقف في الممر بين الكراسي واضح اني مش هالحق كرسي ، و بعد ربع ساعة فتح الطريق .... سيري يا نورماندي بسم الله مجراكي و مرساكي .
نورماندي هاتغرق من كتر الركاب المرة دي ايه هي الناس دي ماشفتش ميني باص قبل كدة ولا اية ،اية الاقبال ده الناس بقت باظه من الباب و لسة ماوصلناش للسيدة عائشة منك لله يا اسطي اسامة.
و هوب و نط راجل على طرطوفة السلم اللي باينة من كتر الناس ماهى ماحشورة و ببسالة و شجاعة تخطي درجتين السلم و وصل لحد عندي الراجل ده عنده خبره في الغطس بين المخلوقات اللحمية لا و اية بايد واحدة التانية كان شايل بيها كيس بلاستيك اصفر كبير هايتقطع من الصينية المحشورة فيه و اكيد بدون ما اذكر استشفيته بخبرتكم الاوتوبيسية اين استقرت الصينية ايووووون استقرت على حجري بدون استأذان كان حجري ده من كماليات الميني باص !! ، كانت الصينية سخنه الحقيقة واضح ان المدام متوصيه بيه و عملة له مسقعة في الفرن و لولا انها مسقعة و لها معزة خاصة في قلبي انا كنت رميتها في وشه انتوا ماتعرفونيش.
طبعا السخنية كانت من فوق ( الصينية ) و من تحت ( الموتور) و من قدام و الجناب ( تلاحم قوى الشعب العريضة داخل الميني باص) حسيت ساعتها اني جيري لما استخبى من توم تحت الفرخة اللي كانت راقدةعلى بيضها و من كتر الحر فقص كنت حاسة اني هافقص قريب و اكون بذلك كسرت كل مقايس الفقص .
و اخيرا محطة السيدة عائشة ... في الحقيقة الاسطي اسامة ماكدبش في ناس فعلا نزلت السيدة عائشة ابو صينية و 2 كانوا متشعلقين على السلم و طلع مكانهم واحدة بمقام عشرة وقفت على السلم ( الله يقطع السلم و سنينه) كان معاها شوال كبيييير سد 3\4 السلم و تبقي 1\4 السلم وقفت هى عليه ولان السلم مش هايكفي كل التخوم و التلال و الهضاب و الشلالات المرتكزة على جسمها قررت تسند رجل على درجة السلم السفلية و رجل على درجة السلم العلوية و الفخدة على حجري انا ، اية ده كله اية ده كله جايبة منين الخير ده كله !!!
- حاسب يا خويا الشوال فيها اكل لا يتهرس من رجلك
كل شئ انكشفن و بان طبيعي لما تحط اكلها في شوال لازم تكون بالحجم الجامبو ده ، طبعا ركبي نملت من كتر تريحة الفخدة عليهم ... يارب ارفع مقطك و غضبك عني ... يا بركة دعاكي يامة في كرسي فضي و شلالات نياجرا راحت تقعد عليه و سابت الشوال على السلم مش مهم المهم ان الفخدة العجالى فارقت رجلي المسكينة ، و من جديد 4 يتشعبطوا على السلم و الناس تناشد السواق ماتركبش حد تاني كفاية ... حرام.... هانفطس ... يا اسطي
كان من ضمن الاربعة واحدة و ابنها والاسطي اسامة ابو قلب حونين رأف بحالها و قالها تقف بين الكرسي اللي جنبه و بين باب الميني باص المفتوح و هي ماكدبتش خبر نطت و انحشرت جنبي هي و ابنها يجيلك و يحط عليك يا اسطي اسامة .
والان مع اعظم المحطات مع محطة اليوم و كل يوم لا سحر ولا شعوذا المحطة دي كانت في اوربا عشان خاطر حبيبنا نقلناها هنا يالا حيوا معانا ساقفة كبيرة لمحطة الدوييييييييييييييقة تارا تتا تا تتا تتا ترارارة تا تتاة تراررة تراه ترارة . من اكثر المحطات المنغصة عيشتي في الميني باص و هذا لروعة سارقيها اقصد راكبيها و حسن خلقهم دايما معطائة الدويقة و خيرها مش ليها ، ركب من هذه المحطة العزيزة راكب واحد فقط و الحمد لله انه واحد فقط ماسك شنطتين بلاستك سود مبلولين و مكببين !! و راسه و ألف جزمة يحشرهم جنبي ( هي المشرحة ناقصة قتله ) في تلك اللحظة التاريخية و تلك الركوبة الجهنمية خرجت عن سكوتي و اعربت عن غضبي بكل شمووووووخ
- لو سمحت حضرتك كدة ماينفعش دي مبلولة و هاتبل هدومي
- لا يا أبلة دي لحمة مجمدة فامرشحة شوية ماية ع الكيس ماتخفييييييييش
- مرشحة ( الله يقرفك ) و طبعا الرشح ده كان مسنود في الشارع على الارض فاصبح طينة طينة طينة اكياسك فيها طينة ، طينة و هدومي يا جدعان اصبح فيها طيييييينة
المهم كلمة مني على كلمة منه و تبريقة منى على زغرة منه راح شال الاكياس من جنبي (طبعا رعبته بتبرقتي ) و هابدهم على الصندل عاااااااا الصندل ابيض الله يخرب بيوتكم ( طبعا في سري)
- يعني حضرتك ينفع كدة سندتها على رجلي فرقت في اية ماهي مبلولة برده و بهدلتني ( لازم ادب القرود يظهر في هذا التوقيت حفظا لماء الوجه و المرمطة خاصة ان لاحظت ان الراجل ده من صفوة الدويقة )
- قولنا مرشح يا ابلة مرششششحة اهو و شال الكيسين و حشرهم ورا رجل الست اللي كانت محشورة اصلا ورا الباب فكرينها... اه ياعيني لسة واقفة نفس الوقفة ، طبعا فضل جزء من الاكياس لازقة فيا برده و قولت امري لله و التلج بقي عمل عمايله هدى شعوري بالحرارة شوية و بعدين لاغي شعوري برجلي خالص اللهم اني لا اسالك رد القضاء و لكن اسالك اللطف فيه
و بعد ان تجمد الوينج الشمال بأكمله و بعد مرمطتون و بهدلتون و طبيخ و بعد الزعيق و ادب القرود و التوبيخ ها هي محطتي هلموا معي بالصريخ على جنب يا اسطي و ها انا بعد المغامرة فرد صحيح و لله الحمد و التسبيح .
تحياتي
هاجر العشري
